Kryetari i Bashkimit Demokratik për Integrim, Ali Ahmeti e ka përsëritur edhe një herë se nuk ka kontakte me Grubin.
“Personalisht, nuk kam kontakt me Artan Grubin dhe nuk kam informacione të detajuara mbi vendndodhjen e tij aktuale. Komenti im u bazua në atë që është deklaruar publikisht nga zyrtarë të qeverisë, si dhe në faktin se ai ka kaluar kufirin në mënyrë të ligjshme. Besoj fuqimisht se çdo qytetar, përfshirë edhe z. Grubi, meriton një proces gjyqësor të drejtë dhe të paanshëm, larg çdo aplikimi selektiv të drejtësisë”, tha Ahmeti për RTV 21.
Ministria e Punëve të Brendshme e Maqedonisë së Veriut publikoi më 18 dhjetor fletarrestimet ndërkombëtare të lëshuara për Grubin dhe ish-drejtorin e Lotarisë Shtetërore, Përparim Bajramin. Këto fletarrestime u lëshuan me kërkesë të Prokurorisë Publike dhe bazohen në vendimin e Gjykatës Themelore, e cila më 17 dhjetor vendosi masën e paraburgimit prej 30 ditësh për të dyshuarit.
Grubi dhe Bajrami akuzohen “për përvetësim të pasurisë së paligjshme”, nga Lotaria Shtetërore, ndërsa dëmi i shkaktuar vlerësohet të jetë rreth 8.2 milionë euro.
Grubi, ish-deputet, tanimë edhe ish-anëtar i BDI-së, në opozitë, rrezikon të dënohet me burgim deri në pesë vjet, nëse shpallet fajtor.
Shpërndaje në
SONDAZH
Loading ...
