Instituti i Shkencës dhe Teknologjisë “INSI” SH.P.K. ka paditur për shpifje Visar Azemi, kryetar i degës së Lidhjes Demokratike të Kosovës në Ferizaj, pas akuzave publike të bëra ndaj kompanisë në rrjetin social Facebook.
Padi është dorëzuar në Gjykatën Themelore të Ferizajt, me arsyetimin se postimi i Azemit, i datës 3 qershor me titullin “A e dini se si po shkatërrohet Ferizaji?”, përmban pretendime të pabazuara që dëmtojnë rëndë reputacionin e kompanisë INSI dhe përbëjnë ndërhyrje në një proces prokurimi publik që ende është në zhvillim.
Në komunikatën për media, INSI e konsideron shkrimin e Azemit një përpjekje të vetëdijshme për të diskredituar punën profesionale të institutit përmes gjuhës së akuzave politike dhe insinuatave të korrupsionit, përcjell Periskopi.
Çfarë pretendon Azemi?
Në postimin e tij, Azemi shprehet se kompania INSI ka fituar një tender prej 550 mijë eurosh, edhe pse kishte ofertë 61 mijë euro më të lartë se operatori tjetër, duke nënkuptuar favorizim apo “dallavere”.
Ai më tej akuzon INSI-n se ka qenë përgjegjëse për “shkatërrimin urban” të Ferizajt në të kaluarën, duke e karakterizuar qytetin si të mbingarkuar me ndërtime pa kritere, beton dhe mungesë hapësirash të gjelbra.
“Dhe sot… ata duan t’i japin edhe një herë të drejtën për të na shkatërruar”, ka shkruar Azemi në përmbyllje të postimit.
Si reagoi INSI?
INSI i quan këto deklarata shpifje dhe ofron sqarime mbi secilin pretendim:
• Tenderi: Oferta financiare ishte vetëm një pjesë e vlerësimit të përgjithshëm – vetëm 20% e pikëve totale. 80% e pikëve i janë dhënë konceptit dhe metodologjisë teknike. Sipas INSI-t, Azemi ka prezantuar informacion të njëanshëm dhe të mangët, që mund të keqinterpretohet si keqpërdorim apo shkelje ligjore.
• Transparenca dhe sekretet afariste: Dokumentet teknike të dorëzuara nga INSI përmbajnë ide krijuese, metodologji pune dhe njohuri profesionale të mbrojtura me ligj si pronësi intelektuale. INSI thekson se kjo është praktikë standarde dhe jo “fshehje e paligjshme”.
• Përgjegjësia për shkatërrim urban: INSI sqaron se nuk ka qenë autoriteti përgjegjës për dhënien e lejeve ndërtimore apo menaxhimin urbanistik, pasi këto janë kompetenca të komunës, sipas Ligjit për Planifikim Hapësinor.
• Ndërhyrje në proces prokurimi: Kompania thekson se deklaratat e Azemit përbëjnë ndikim të padrejtë në një proces tenderues ende në zhvillim.
Kush është INSI?
INSI është një kompani private që ofron shërbime në planifikimin hapësinor dhe urban. Ka punuar në projekte të ndryshme në Kosovë, Maqedoni të Veriut, Shqipëri dhe së fundmi ka zgjeruar aktivitetin edhe në Gjermani. Ajo thotë se i përmbahet vlerave të profesionalizmit, cilësisë teknike dhe paanshmërisë politike.
Në fund të komunikatës, INSI bën thirrje për largim nga shpifjet dhe kthim te debati profesional dhe i argumentuar. Instituti deklaron se mbetet i hapur për bashkëpunim dhe synon të vazhdojë kontributin për zhvillimin e qëndrueshëm urban në Kosovë dhe më gjerë.
