Selektori i Gjermanisë, Hansi Flick e ka dërguar asistentin e tij, Marcus Sorg për ta vëzhguar Mërgim Berishën.
Dhe, futbollisti kosovar shkëlqeu pikërisht në praninë e përfaqësuesve të Kombëtares gjermane.
Sorg ishte i pranishëm në stadium në ndeshjen që Augsburgu e fitoi me rezultat 1:0 ndaj Bayer Leverkusenit, njofton tabloidi gjerman “Bild”, përcjell “Kosovalive”.
Futbollisti nga Suhareka kështu e arriti golin e gjashtë në 13 ndeshje në Bundesligë.
Ndërkohë, atë e ka lavdëruar trajneri i tij, Enrico Maasen.
“Në Gjermani ka shumë pak 9-sha më të mirë se Mërgimi që i kemi për momentin”, ka thënë trajneri i Augsburgut.
24 vjeçari është i huazuar nga Fenerbahçe në Augsburg, ndërsa shpreson të qëndrojë më gjatë në Gjermani.
Ndërkohë, ish-futbollisti i Salzburgut nuk e ka fshehur dëshirën për t’u rikthyer në Kombëtare, ku luajti për grupmoshat U-21.
“Natyrisht, do të isha i lumtur nëse ftohem në Kombëtaren gjermane. E vetmja gjë në të cilën po mendoj është që ta jap 100 për qindëshin në fishën e blertë dhe të marr sa më shumë që mundem nga fusha e blertë”, deklaroi Berisha, i cili është njëkohësisht edhe objektiv i Kombëtares së Kosovës, por që prioritet e ka Gjermaninë.
Flick ka paralajmëruar befasi në listën e tij që do ta publikojë kah mesi i muajit mars, ndërsa Berisha mund të jetë njëri prej të ftuarve të selektorit të Gjermanisë, përcjell Kosovalive.
Berisha është lindur në Berchtesgaden të Gjermanisë dhe i ka zhvilluar 13 ndeshje me U-21, derisa e ka realizuar edhe një gol.
Nëse Mërgimi vazhdon të shënojë gola në javët në vazhdim, nuk do të jetë befasi nëse e shohim emrin e tij në mesin e të ftuarve për kualifikimet e Euro 2024.