Kryeministri i Kosovës Albin Kurti në orët e vona të së martës i ka përmendur disa veprime të qeverisë së tij, të cilat i ka quajtur lajme të mira për qytetarët.
Kurti ka folur për rritjen e pagave në sektorin publik, rritjen e pagës minimale, shtesat për fëmijët dhe për pensionet, shkruan gazeta online Kosovalive.
Kurti ka thënë se Qeveria e tij sfidave e krizave globale i është qasur me pjekuri dhe me përgjegjësi ndaj parasë publike.
Kreu i ekzekutivit tha se Qeveria e tij në vend të zgjidhjeve e politikave populliste dhe të papërgjegjshme, ka zgjedhur rrugën më të gjatë, por më të sigurt dhe më të qëndrueshme: për të tashmen dhe të ardhmen.
Postimi i plotë:
Rritjen ekonomike dhe të hyrave në buxhetin e shtetit, po i kthejmë në rritje të pagave, pensioneve, shtesave dhe mirëqenies së qytetarëve. Jemi shumë të lumtur që muajve të fundit kemi pasur mundësinë që të ndajmë lajme të mira e të njëpasnjëshme për bashkëqytetarët tanë.
Pagat për sektorin publik për mbi 83 mijë zyrtarë publik po i rrisim duke filluar nga janari i vitit të ardhshëm. Nga janari gjithashtu fillon ekzekutimi i pensioneve me rritje të kategorive të dala nga lufta, ndërkohë që pensionistët e moshës, përfituesit e skemave pensionale invalidore dhe të aftësive të kufizuara këtë muaj kanë marrë pensione me rritje prej 20%. Në gusht, shtesat për mbi 410 mijë fëmijë i kemi dyfishuar e në raste trefishuar atëherë kur prindërit kanë tre ose më shumë fëmijë.
Kurse që nga ky muaj paga minimale në sektorin privat është rritur në 350 euro, pas 13 vitesh.
Sfidave e krizave globale i jemi qasur me pjekuri dhe me përgjegjësi ndaj parasë publike dhe qëndrueshmërisë financiare të shtetit tonë. Në vend të zgjidhjeve e politikave populliste dhe të papërgjegjshme, kemi zgjedhur rrugën më të gjatë, por më të sigurt dhe më të qëndrueshme: për të tashmen dhe të ardhmen.
Të dashur qytetarë,
Ju falemnderit për durimin, mirëkuptimin dhe mbështetjen.
Shpërndaje në
SONDAZH
Loading ...
