Në Kupën e Botës për Klube do të jenë të pranishëm disa nga yjet më të mëdhenj të futbollit botëror.
Ousmane Dembélé do të jetë pjesë e PSG-së dhe është një nga kandidatët kryesorë për të fituar “Topin e Artë”. Ndeshja e parë e PSG-së do të jetë të dielën kundër Atletico Madridit.
Kylian Mbappé, fitues i “Këpucës së Artë”, është një tjetër lojtar i pazëvendësueshëm dhe do të synojë të shkëlqejë edhe në këtë edicion të Kupës së Botës për Klube, me një objektiv të qartë – trofeun. Ndërkohë, edhe pse Cristiano Ronaldo nuk do të marrë pjesë, Lionel Messi do të jetë prezent me Inter Miamin, duke synuar të shkëlqejë njëherësh me ish-lojtarët e Barcelonës, Luis Suarez, Sergio Busquets dhe Jordi Alba.
Erling Haaland, një nga golashënuesit më të mirë të Evropës dhe ylli i Manchester City, do të jetë gjithashtu pjesë e këtij kompeticioni, duke u bërë pjesë e një gare ku priten performanca të shkëlqyera.
Antoine Griezmann, një tjetër figurë e njohur e Atletico Madridit, do të jetë një nga liderët kryesorë të skuadrës së tij në këtë garë prestigjioze të klubeve.
Një tjetër emër i madh në këtë listë është Harry Kane, sulmuesi i Bayern Munichut, i njohur për aftësitë e tij mbresëlënëse para portës, dhe me 45 gola në 55 ndeshje është një ndër sulmuesit më të mirë të momentit.
Të tjerë lojtarë që mund të shkëlqejnë në këtë turne janë Cole Palmer, Angel Di Maria, Lautaro Martinez dhe Sergio Ramos. Me një mori lojtarësh të njohur në këtë ngjarje, pritet një turne emocionues dhe plot aksion.
