Armët më të sofistikuara të Kinës u ekspozuan në një paradë madhështore ushtarake, e cila u mbajt për të shënuar 80-vjetorin e fitores kundër Japonisë në Luftën e Dytë Botërore. Mes tyre u panë armë me lazer, raketa balistike bërthamore dhe dronë gjigantë nënujorë.
Presidenti Xi Jinping, në fjalimin e tij para paradës, deklaroi se vendi i tij është “i pandalshëm” dhe se “nuk do të frikësohet kurrë” nga ngacmuesit.
Në këtë ngjarje morën pjesë 26 liderë shtetesh, mes tyre presidenti i Rusisë, Vladimir Putin, dhe lideri i Koresë së Veriut, Kim Jong Un. Kjo shënon herën e parë që Xi, Putin dhe Kim shfaqen së bashku në një takim publik.
Sipas BBC, ambiciet e Xi-së u reflektuan qartë në mëngjesin e së mërkurës, pasi parada dha sinjale për çdo plan të mundshëm të Pekinit për të sulmuar ishullin demokratik të Tajvanit, të cilin Kina e konsideron pjesë të saj.
Nga ana tjetër, presidenti i SHBA-së, Donald Trump, nuk ishte i pranishëm në paradë, por në një postim në Truth Social ai qortoi Xi-në, Kimin dhe Putinin për një “komplot” kundër Shteteve të Bashkuara.
“Pyetja më e rëndësishme është nëse Presidenti Kinez Xi Jinping do ta përmendë apo jo mbështetjen dhe gjakun e jashtëzakonshëm që Shtetet e Bashkuara i kanë dhënë Kinës për ta ndihmuar atë të çlirohet nga një pushtues i huaj shumë armiqësor. Ju lutem shprehni përshëndetjet e mia më të ngrohta Vladimir Putin dhe Kim Jong-un ndërsa komplotoni kundër Shteteve të Bashkuara”, shkroi ai.
