Ndeshja mes Liverpoolit dhe Manchester Unitedit, e zhvilluar të dielën në “Anfield”, ka përfunduar pa fitues, me rezultat 2:2.
Ky ishte një derbi i zjarrtë, i cili ofroi spektakël dhe emocion, veçanërisht gjatë pjesës së dytë, ku ritmi i lojës ishte shumë i lartë dhe u shënuan katër gola.
Në minutën e 52-të, Lisandro Martinez e kaloi Manchester Unitedin në epërsi 1:0 me një gol të shënuar pas asistimit të Bruno Fernandesit. Mirëpo, Liverpooli reagoi menjëherë dhe barazoi shifrat në minutën e 59-të me golin e Cody Gakpos, që shënoi pas një asistimi nga Alexis Mac Allister.
Lideri i Premier League, Liverpool, kaloi më pas në epërsi 2:1 me një gol nga penalltia nga Mohamed Salah në minutën e 70-të. Me këtë gol, Salah arriti shifrën e 175 golave në Premier League, duke e barazuar këtë shifër me legjendën e Arsenalit, Thierry Henry.
Nuk ishte fundi i dramës, pasi Amad Diallo shënoi për 2:2 në minutën e 80-të. Loja vazhdoi me raste të shumta, por pa asnjë gol tjetër. Mbrojtësi i Unitedit, Harry Maguire, pati mundësinë për të shënuar një gol të artë në minutën e shtatë shtesë, por nuk e shfrytëzoi.
Pas këtij barazimi, Liverpooli vazhdon të mbajë kreun e tabelës me 46 pikë nga 19 ndeshje, ndërsa Arsenal është i dyti me 40 pikë nga 20 ndeshje. Manchester Unitedi ndodhet në vendin e 13-të me 23 pikë, por lojën e së dielës e dhuroi një shfaqje të paharrueshme që riktheu në mendje përballjet e mëdha mes këtyre dy skuadrave.
Shpërndaje në
SONDAZH
Loading ...
