Sot, e mërkurë, në fshatin Bllacë të Suharekës do të mbahen homazhe në nderim të heroit Ramë Bllaca, në 88-vjetorin e rënies së tij.
Ceremonia do të zhvillohet pranë lapidarit të ngritur në vendlindjen e tij, duke filluar nga ora 10:00.
Kush ishte Ramë Bllaca
Ramë Bllaca (1879–1937) u lind në fshatin Bllacë të Suharekës dhe mbetet një nga emrat më të shquar të historisë shqiptare të fillimit të shekullit XX.
Ai shërbeu si deputet i Xhemijetit në parlamentin jugosllav, duke përfaqësuar interesat e shqiptarëve në një periudhë të vështirë politike, raporton Klankosova.tv.
I njohur për qëndrimet e tij të palëkundura, Bllaca refuzoi të firmoste marrëveshjen për shpërnguljen e shqiptarëve në Turqi, duke dëshmuar guxim dhe besnikëri ndaj tokës dhe identitetit kombëtar.
Trashëgimia e tij patriotike u përcoll edhe tek i biri, Qazim Bllaca, i cili më vonë shërbeu si ministër në qeverinë e kryeministrit Ibrahim Mitrovica.
Ramë Bllaca do të mbetet një figurë e paharruar e historisë sonë, simbol i vendosmërisë për të mos bërë kompromise në dëm të kombit.
