Me ardhjen e tifozëve të parë në Katar për të përjetuar Kupën e Botës, e cila fillon të dielën, më 20 nëntor, janë shfaqur edhe shqetësimet e para se sa e ndryshme do të jetë përvoja në krahasim me Botërorët e mëparshëm.
Ekziston edhe një shkallë frike në lidhje me rregullat strikte të sjelljes të kërkuara nga autoritetet e Katarit, të ndryshme nga ato në Perëndim, të cilat krijojnë pasiguri tek tifozët që do të vërshojnë në Katar nga vende të ndryshme të botës, shkruan Marca.
Ambasada gjermane në Doha ka publikuar në faqen e saj të internetit një manual me titull “Informacion i dobishëm për vizitorët e Kupës së Botës FIFA 2022 në Katar”, i cili, ne e kuptojmë, mund të shtrihet për vizitorët nga pjesë të tjera të botës.
Në një seksion të quajtur ‘Rregullat e sjelljes dhe rekomandimet’, fansat inkurajohen të shmangin shfaqjet publike të dashurisë, pavarësisht nga orientimi seksual dhe se “përdorimi i gjuhës ose gjesteve të turpshme mund të jetë një vepër e dënueshme me burgim ose gjobë. Dehja është e ndaluar”.
Në njoftim gjithashtu paralajmërohen për sendet që nuk duhet të sillen në vend.
“Importimi i alkoolit dhe materialeve pornografike, si dhe i librave fetarë, është i ndaluar. Importimi i ushqimit të derrit gjithashtu nuk lejohet. Trafiku i drogës mund të dënohet me vdekje”.
Dhe, në një shënim më serioz dhe që prek lirinë e personave LGBTQIA+ thuhet se “e drejta penale në Katar është formësuar nga konceptet morale fetare. Udhëtari duhet të jetë i vetëdijshëm se marrëdhëniet e të njëjtit seks dhe seksi jashtëmartesor janë të ndaluara dhe i nënshtrohen ndjekjes penale”.
