Komuna e Prishtinës ka bërë me dije se në orët në vijim pritet të ketë erëra të forta, të cilat do të shoqërohen me reshje shiu dhe bore.
Përmes një njoftimi për media, komuna i ka ftuar qytetarët të kenë kujdes.
Komuna ka bërë me dije se ekipet e emergjencave janë në gatishmëri të plotë për çdo situatë.
Njoftimi i plotë:
Të dashur qytetarë të Prishtinës,
Duke pasur parasysh parashikimet e motit për orët në vijim, ju njoftojmë se priten erëra të forta të shoqëruara me reshje shiu, ndërsa në orët e vona të natës do të ketë edhe reshje bore.
Ju lusim të tregoni kujdes të shtuar, veçanërisht:
• Siguroni objektet e lëvizshme në ballkone ose oborre për të shmangur dëmet nga era.
• Reduktoni lëvizjet e panevojshme në kushte të motit të rënduar.
• Kujdesuni për sigurinë në trafik dhe shmangni parkimin pranë pemëve ose objekteve të rrezikshme.
Ekipet tona të emergjencave janë në gatishmëri të plotë për çdo situatë të mundshme. Për ndihmë apo raportime, mund të kontaktoni Drejtorinë për Siguri dhe Emergjenca në numrin 0800 122 33 ose 122 44.
Së bashku, të kujdesshëm, e kalojmë çdo sfidë.
Shpërndaje në
SONDAZH
Loading ...
