Lëvizja Vetëvendosje ka berë të ditur se kanë pritur në një takim delegacionin nga Zyra e Bashkimit Evropian sot në Prishtinë.
Temë diskutimi ishin zgjedhjet qendrore që do të mbahen në shkurt të vitit të ardhshëm.
LVV-ja përmes një njoftimi theksoi se është theksuar fakti që ky proces zgjedhor do të jetë i pari pasi që një qeveri përfundon mandatin e rregullt të saj katërvjeçar, përcjell Kosovalive.net.
Njoftimi i plotë:
Sot në zyrën qendrore të Lëvizjes VETËVENDOSJE!, sekretari organizativ Alim Rama, nënkryetarja e dytë Lëvizjes VETËVENDOSJE! Mrika Limani-Myrtaj, koordinatorja e sekretariateve, Albana Gashi, Filiz Mustafa nga koordinimi me qendra dhe Alma Haxhija nga zyra ligjore, kanë pritur në një takim delegacionin nga Zyra e Bashkimit Evropian.
Temë e këtij takimi ishte çështja e zgjedhjeve qendrore që do të mbahen në shkurtin e vitit të ardhshëm, me ç’rast është bashkëbiseduar për hapat përgatitorë, situatën e përgjithshme, si dhe fushatën zgjedhore të Lëvizjes VETËVENDOSJE!.
Është theksuar fakti që ky proces zgjedhor do të jetë i pari pasi që një qeveri përfundon mandatin e rregullt të saj katërvjeçar. Temë shoqëruese e diskutimeve padyshim që ka qenë dhe ligji i ri i zgjedhjeve me theks të veçantë votimi i mërgatës, që këtë herë mundësohet edhe në vendet ku ata jetojnë.
Po ashtu, u diskutua situata e sigurisë në pjesën veriore të Republikës, ku u potencua fakti që për herë të parë qytetarët mund të votojnë të lirë dhe pa presion nga bandat kriminale, falë ndryshimit të shtrirjes së rendit dhe ligjit nga ana e qeverisë.
Lëvizja VETËVENDOSJE! është e gatshme për proceset zgjedhore, e mirëstrukturuar dhe e bindur drejt rezultateve pozitive që më shumë se secilit iu shërbejnë qytetarëve
