Gjykata Themelore në Prishtinë ka vendosur një muaj paraburgim ndaj të pandehurit M.M, për shkak se i njëjti dyshohet se ka kryer veprën penale Krim i Organizuar lidhur me veprën penale Prodhimi, përpunimi i paautorizuar i narkotikëve, substancave psikotrope dhe analoge ose mjeteve, pajisjeve dhe materialit për narkotik.
Sinjali zbuloi ekskluzivisht se bëhet fjalë për Milos Maksimoviq – Žuti, i dyshuar për laboratorin e drogës ku pronar ishte Nedelkoviq.
Burimet e njëjta kanë bërë me dije se 36-vjeçari ishte ndaluar në pikën kufitare në Jarinje, gjatë hyrjes në Kosovë, të premten pak para mesnatës.
Në njoftimin e lëshuar thuhet se të pandehurit M.M i hiqet masa e dorëzanisë dhe caktohet se vlera e mjeteve monetare në shumë prej 30 mijë euro, e deponuar më datë 27.03.2023 në emër të dorëzanisë, të derdhet në Programin për Kompensimin e Viktimave të Krimit.
“Ekziston dyshimi i bazuar se i pandehuri M.M, duke vepruar si pjesë e grupit të organizuar dhe të strukturuar kriminal, me dashje ka vepruar në grup kriminal të organizuar, me qëllim të përfitimit të kundërligjshëm të dobisë pasurore, janë marrë me prodhimin dhe kultivimin e substancave narkotike të cilat i përpunojnë dhe më vonë i shesin, po ashtu edhe kanë blerë me qëllim të shitjes të substancave narkotike të llojit marihuan dhe kokainë, ashtu që me rastin e kontrollit të zbatuar nga pjesëtarët e Policisë së Kosovës me urdhëresë të gjykatës, tek i pandehuri janë gjetur një sasi e substancave narkotike, bimë të mbjellura narkotike, pajisje për përgatitjen e tyre për t’i plasuar në treg, e të cilat janë sekuestruar nga policia me rastin e zbatimit të urdhër kontrollit në shtëpitë dhe lokalet përcjellëse të të pandehurve, me këtë ekziston dyshimi mirë i bazuar se ka kryer veprën penale Krim i organizuar lidhur me veprën penale Prodhimi dhe përpunimi i paautorizuar i narkotikëve, substancave psikotropçe, analoge apo veglave, paisjeve apo materialeve narkotike”, thuhet në njoftim.
Gjykata vlerësoi se e caktimi i masës së paraburgimit është masë e domosdoshme, sepse rreziku i ikjes i referohet faktit se i pandehuri ka qenë nën masën e dorëzanisë, i cili e ka dorëzuar edhe dokumentin e udhëtimit – pasaportën sipas vendimit të gjykatës.
“Por i njëjti është ndaluar në pikën kufitare më datë 27.09.2024 rreth orës 23:00 duke hyrë në Kosovë nga territori i Serbisë, pa dokument të udhëtimit – pasaportë, pasi të njëjtit i është ndaluar në gjykatë sipas vendimit të Gjykatës, e që me këtë nëse i njëjti lihet në liri paraqet rrezik real për ikjen e tij, sidomos në territorin e shtetit të Serbisë, pasi i njëjti ka nënshtetësi serbe, andaj edhe rreziku i ikjes, zvarritja e procedurës penale e potencialisht edhe përsëritja e veprave penale ekziston, ngase i njëjti ka vepruar në grup kriminal të organizuar, atëherë gjykata vlerësoj se kërkesa e prokurorisë është mjaftueshëm e bazuar”.
Kujtojmë se më 23 maj 2022, Policia dhe Dogana zhvilluan një aksion në fshatin Rudine të komunës së Zveçanit, kundër prodhimit ilegal të kriptovalutave, por që rezultoi me zbulimin e laboratorit të drogës – ku u gjetën të mbjella mbi 10 mijë fije bimë të gatshme për t’u shitur ilegalisht në treg.
Pas një muaji nga ky aksion, Maksimoviq kishte rënë në prangat e Policisë së Kosovës.
Shpërndaje në
SONDAZH
Loading ...
