Lideri i Aleancës për Ardhmërinë e Kosovës, Ramush Haradinaj, ka thënë se me qasjen vetizoluese të Qeverisë, Kosova është përjashtuar nga harta e investimeve të jashtme, raporton Gazeta Online Reporteri.net.
Në një postim në rrjetin social Facebook, Haradinaj ka thënë se këtë e ka theksuar edhe i Dërguari i Posaçëm i Gjermanisë për Ballkanin Perëndimor, Manuel Sarrazin, i cili tha se shumë investitorë po i drejtohen shteteve të rajonit.
“Gjermania ka qenë dhe mbetet një shtyllë e fortë në krijimin dhe ndërtimin e shtetit të Kosovës, si dhe një ndër partnerët tanë kryesorë. Për fat të keq, me qasjen vet-izoluese të Qeverisë së Kosovës, vendi ynë është përjashtuar nga harta e investimeve të jashtme. Këtë e theksoi edhe i dërguari special i Gjermanisë për Ballkanin Perëndimor, z. Manuel Sarrazin, në Forumin e Dytë Ekonomik Gjermano-Kosovar, të organizuar nga Oda Ekonomike Gjermano-Kosovare, ku konfirmoi shqetësimin tonë se shumë investitorë po i drejtohen shteteve të tjera të rajonit”, shkroi ai.
Sipas Haradinajt, vetizolimi i Kosovës po sjellë jo vetëm dëme politike, por edhe ekonomike.
Ai thekson se Kosovës i duhet ndryshim urgjent, për ta kthyer vendin në rrugën e zhvillimit.
“Vet-izolimi i Kosovës po na sjell jo vetëm dëme politike, por edhe dëme të mëdha ekonomike. Kjo po reflektohet qartë në largimin masiv të fuqisë punëtore dhe mungesën e vendeve të reja të punës për shkak të mungesës së investimeve.
Kosovës i duhet ndryshim urgjent, për ta kthyer vendin në rrugën e zhvillimit. Ne kemi potencial në inovacion dhe zhvillim, por për të përfituar nga ky potencial, na duhet një mentalitet i ri qeverisës”, shtoi më tej Haradinaj.
Ndryshe, emisari gjerman Sarrazin, në Forumin e dytë ekonomik gjermano-kosovar, i cili po mbahet në Prishtinë ka thënë se kompanitë që duan të investojnë në ndonjërin prej gjashtë vendeve të Ballkanit Perëndimor e shikojnë edhe potencialin që e jep rajoni si i tërë.
Prandaj, ai tha se aktualisht shumica e investitorëve shkojnë në Serbi sepse duan të bëjnë biznes me tërë rajonin. Ai thotë se kjo duhet të ndryshohet dhe që investimet të vijnë edhe në Kosovë.
Shpërndaje në
SONDAZH
Loading ...
