Presidentja e Kosovës, Vjosa Osmani, ka pritur dje në takim Komisionerin e Lartë të OSBE-së për Pakicat Kombëtare, Christophe Kamp.
Gjatë takimit, Osmani theksoi se Kosova ka sistemin më të avancuar të mbrojtjes së të drejtave të njeriut në të gjithë Evropën dhe se mbetet e përkushtuar për garantimin e të drejtave të të gjithë qytetarëve pa dallim etnie, feje apo përkatësie tjetër.
Presidentja tutje theksoi se përmes Këshillit Konsultativ për Komunitete, Presidenca po punon çdo ditë me përfaqësuesit e të gjitha komuniteteve jo-shumicë për t’i adresuar shqetësimet e tyre dhe për të gjetur zgjidhje konkrete.
Ajo ritheksoi përkushtimin për fuqizimin e mëtejmë të të gjithë qytetarëve të Republikës dhe avancimin e standardeve më të larta demokratike.
Tutje, Presidentja tha se gjithëpërfshirja, e ndërtuar mbi respektin e ndërsjellë, barazinë dhe liritë themelore, mbetet prioritet, kurse theksoi se diversiteti është një vlerë e shoqërisë sonë.
