Kreu i Lidhjes Demokratike të Kosovës, Lumir Abdixhiku po akuzon kryeministrin Albin Kurti se po mbron, siç i quan ai ‘të korruptuarit’ gjatë qeverisjes së tij. Ndërsa, presidenten Vjosa Osmani e kritikoi për reagime të vonshme në lidhje me rastin e ambasadorit Martin Berishaj.
Abdixhiku, kandidat për kryeministër, tha se dallimi thelbësor mes tij dhe kryeministrit Kurti është që ky i fundit udhëheqë një Qeveri më përplotë të korruptuar dhe të njëjtit i mbron.
“Ke një kryeministër që e mbron këtë të korruptuarin. Unë i kam diku 9 mijë 781 kryetarë e anëtarë të kryesive të LDK-së. Nuk garantoj që ndonjëri prej tyre edhe nuk vjedh, por ju garantoj një gjë që do ta ballafaqoj publikisht i pari unë. Do ta distancoj dhe dënoj faktin që mundin tim dhe të bashkëpunëtorëve të mi ta keqpërdor dikush”- tha Abdixhiku në një intervistë në emisionin “KallxoPërnime”.
Ndërsa, reagimin e presidentes Osmani në lidhje me këtë rast, Abdixhiku e quajti të vonshëm.
“Reagim i vonshëm për besë. Ma mirë vonë se kurrë, ama i vonshëm”- tha ai.
Presidentja Osmani në emisionin “Kallxo Përnime”, më 08.09.2024, deklaroi se nuk e ka ftuar ambasadorin Berishaj gjatë vizitës së fundit që ka zhvilluar në Kroaci.
Ajo tha se në raste të tilla, sipas saj, më e mira është që ai të largohej vetë nga pozita.
“Unë dëshiroj që institucionet e drejtësisë të japin fjalën e vet dhe më e mira në raste të tilla dhe më e mira do ishte që derisa të kryheshin procedura të tilla ai të largohej nga ajo pozitë. Nuk mundet presidentja me shkarku dikë krye më vete sepse është procedurë. Unë në disa raste kam kërku që në qoftë se kjo çështje nuk sqarohet do të ishte më mirë që ai me u tërheqë vetë”- u shpreh ajo.
Më 29.03.2024, ambasadori Berishaj ka përfunduar intervistimin e tij në Prokurorinë Speciale pas disa orë qëndrim brenda.
Berishaj po dyshohet për 3 vepra të ndryshme penale.
Abdixhiku thotë se nuk do pranojë të ia bëj votat Kurtit qoftë edhe nëse i kërkohet nga Amerika, qoftë edhe nëse do të ketë krizë politike.
“Nuk dëgjoj për atë punë. Nuk e bën Lumiri më”- tha Abdixhiku.
Ai tha se rruga e Kurtit është e dëmshme dhe nuk do të kontribuojë në një gjë të tillë.
“Me Lëvizjen Vetëvendosje kemi probleme të thella ideologjike, politike dhe besa edhe të mirëbesimit. Kështu që është hendek i madh.
Abdixhiku tha se LDK-ja merr pozicion qeveritar vetëm nëse e ka udhëheqjen e Qeverisë. Lumir Abdixhiku në Qeverinë Kurti I kishte postin e ministrit të Infrastrukturës dhe Transportit.
Lidhja Demokratike e Kosovës kishte inicuar mocion mosbesimi për rrëzimin e qeverisë Kurti I, edhe pse atëherë Abdixhiku ishte shprehur kundër këtij mocioni.
