Deputeti i LDK-së, Lutfi Haziri ka komentuar zhvillimet e fundit në vend, saktësisht asaj që po ndodh në Kuvendin e Kosovës, duke thënë se “agjenda e fshehur po ecën”.
Përmes një postimi në llogarinë e tij në Facebook, nënkryetari i LDK-së shprehet se kur të gjithë besonin që me zgjedhjen e Kryetarit dhe Nënkryetarëve të shumicës politike e etnike, u bë një hap para, ndodhi veprimi.
“Politikë ‘një hap para e dy prapa’ edhe në rastin e konstituimit të Kuvendit. Kur të gjithë besonin që me zgjedhjen e Kryetarit dhe Nënkryetarëve të shumicës politike e etnike, u bë një hap para, ndodhi veprimi. Ndarja e zgjedhjes së Nënkryetarëve të pakicave dhe dy hapa prapa. Asgjë e re. Më rëndësi që agjenda e fshehur po ecën”, thotë ai.
“Këta s’e kuptojmë ose nuk duan ta kuptojnë frymën e Kushtetutës që bashkëpunimi është obligativ e jo vullnet. Pragmatizmi politik e kompromisi janë vlera në politikë e jo dobësi. Sa i përket të drejtave për komunitetet pakicë në Kosovë edhe vetë jam bindur tash se pse miqtë ndëkombatarë na kërkonin që t’i bënim e garantonim vetëm me mekanizma kushtetues. Republika, mbi të gjitha”, ka shkruar tutje deputeti, njofton Klankosova.tv.
