Banorët e fshatrave Besi dhe Vranidoll të Prishtinës janë ankuar për mungesën e mbikalimeve në rrugën Prishtinë-Podujevë, përkatësisht afër shkollave.
Sipas një komunikate të Këshillit Lokal të fshatit Besi thuhet se më së shumti të rrezikuar do të jenë fëmijët pas fillimit të procesit mësimor.
“Jemi në prag të fillimit të ri shkollor dhe ende nuk ka mbikalim në Besi dhe Vranidoll, gjë që për shkak të kësaj, rrezikohen fëmijët për ta vijuar procesin mësimor”.
“Pavarësisht kërkesave dhe peticionit që në emër të Këshillit Lokal në Besi ia kemi dërguar Ministrisë së Infrastrukturës, ende nuk kemi përgjigje dhe zgjidhje në këtë drejtim”, thuhet në reagim, transmeton Klankosova.tv.
Kryetari i Këshillit Lokal në Besi, Bislim Syla, bëri të ditur se banorët e fshatrave Besi, Vranidoll, Rimanishtë dhe Teneshdoll do të marrin masa radikale, përfshirë edhe protestat.
“Si kryetar i Këshillit Lokal në Besi, shpreh shqetësimin tim për neglizhencën e Institucioneve. Prandaj, jam i shtyrë nga banorët e fshatrave Besi, Vranidoll, Rimanishtë dhe Teneshdoll që të marrim masa më radikale, duke përfshirë edhe protestat”, tha Syla.
