Sipas mediave gjermane, aksidenti që ndodhi në Koblenz erdhi pas një udhëtim familjar që përfundoi në tragjedi, ku një minibus ka përfunduar i përmbysur duke shkaktuar tre viktima dhe gjashtë të plagosur.
Sipas policisë, aksidenti ndodhi rreth orës 3 të mëngjesit në zonën Bassenheim në distriktin Mayen-Koblenz në drejtim të Trier.
Minibusi, me nëntë pasagjerë që po ktheheshin nga një festë familjare në Hesse, doli nga rruga dhe u përmbys disa herë për arsye ende të paqarta.
Sipas policisë, shoferi 22-vjeçar nuk ishte nën ndikimin e alkoolit apo drogës, dhe hetimet janë ende në vijim.
Ndër viktimat janë një burrë 53-vjeçar dhe dy gra, një 47-vjeçare dhe një 65-vjeçare. Gjashtë personat e tjerë, me moshë nga 20 deri në 66 vjeç, pësuan lëndime jo kërcënuese për jetën.
Kujtojmë që në lidhje me këtë aksident Ministria për Evropën dhe Punët e Jashtme e Shqipërisë thotë se viktimat janë nga Shqipëria.
Nuk pati përfshirje të automjeteve të tjera në aksident, megjithëse një makinë tjetër u detyrua të tërhiqej pas goditjes së mbetjeve në rrugë.
Autostrada u mbyll për më shumë se katër orë dhe u hap sërish në mëngjes.
Në vendngjarje ishin të pranishëm dhjetëra automjete të shërbimeve të emergjencës, policisë dhe zjarrfikësve për të ndihmuar në menaxhimin e situatës dhe rimëkëmbjen e minibisit.
