Ministri i Jashtëm i Rusisë, Sergei Lavrov, ka reaguar ashpër ndaj Bashkimit Evropian pas deklaratave të fundit të kancelarit gjerman Olaf Scholz, i cili ka sugjeruar heqjen e kufizimeve për përdorimin e armëve të dhëna Ukrainës nga Gjermania.
Në një deklaratë publike, Lavrov theksoi se dërgimi i armëve me rreze të gjatë veprimi nuk është një zhvillim i ri, por një plan i hershëm që është mbajtur i fshehur nga publiku. Ai akuzoi udhëheqësit evropianë se po ndjekin një axhendë të rrezikshme, duke vënë në rrezik stabilitetin rajonal dhe duke penguar përpjekjet për paqe.
“Ky vendim ekspozon cilësinë dhe nivelin e atyre që kanë marrë pushtetin në Evropë. Ata janë të gatshëm të sakrifikojnë stabilitetin për interesa të ngushta politike,” deklaroi Lavrov.
Ai shtoi më tej se qeveritë perëndimore po sabotojnë me vetëdije procesin diplomatik dhe se paqja nuk është në interesin e tyre, pasi ajo do të rrezikonte pozitat e tyre politike.
