Mbrëmë në “Rubikon” të Klan Kosovës, u diskutua rreth dështimit për konstituimin e plotë të Kuvendit, e paralajmërimi i Listës Serbe për ankesë në Gjykatën Kushtetuese.
Sipas opinionistit politik, Melazim Koci, me Kushtetutë të Kosovës nuk përcaktohet se cilës parti serbe i takon nënkryetari, por siç thotë ai, kjo gjë saktësohet me Rregulloren e Kuvendit.
Sipas Kocit, bazuar në Rregulloren e Punës së Kuvendit, përkatësisht nenit 12, paragrafit 6, thuhet se kandidati për nënkryetar të Kuvendit nga radhët e komunitetit serb, propozohet nga shumica e deputetëve të komunitetit serb.
Nga ana tjetër, drejtori ekzekutiv i Institutit të Kosovës për Drejtësi (IKD), Ehat Miftaraj, ka thënë se është e ditur që Lista Serbe dirigjohet nga Beogradi, megjithëse ai shtoi se deputetët nuk duhet ta shkelin Kushtetutën.
Ndër të tjera, Miftaraj tha se partia serbe në Kosovë, ka vetëm trupin, transmeton Klankosova.tv.
E analisti politik, Azdren Shala ka deklaruar se të gjitha partitë politike në vend po valëvitin, siç e ka quajtur ai, “flamurin e marrëzisë” në raport me Listën Serbe.
Historiani shtoi se subjektet politike janë duke e luajtur gjyqësorin, dhe sipas tij, nuk po e kryejnë punën që u takon.
Në këtë Kuvend të Kosovës kurrë nuk kam parë performancë më të dobët dhe, besa, më të gërditshme. Janë duke luajtur me naivitet dhe gërditshëm po aq sa Albin Kurti, edhe PDK-ja, LDK-ja dhe AAK-ja”, theksoi Shala.
Sipas tij, Listën Serbe është mirë ta kuptojnë PDK-ja, LDK-ja dhe AAK-ja, pasi siç u shpreh Shala, ky subjekt politik nuk është terroriste pa një aktgjykim të Gjykatës.
Analisti politik, Vehbi Kajtazi, nga ana tjetër ngriti pikëpyetje nëse kryetari i sapozgjedhur i Kuvendit, Dimal Basha e përfaqëson këtë institucion në mënyrën më të mirë të mundshme, teksa tha se nuk sheh dallim të madh në mes kreut të VV-së, Albin Kurtit, atij të LDK-së, Lumir Abdixhikut dhe të PDK-së, Memli Krasniqit.
“Nuk shoh dallim të madh në mes Kurtit dhe Abdixhikut dhe as Memli Krasniqit. Pra, Kurti po i merr mbrapa në idetë e tij të mbrapshta tash e 5 vjet sa është në pushtet, pra këta vetëm i shkojnë mbrapa. Nuk janë në gjendje t’i paraprijnë asnjëherë dëmeve që ia ka shkaktuar dhe po ia shkakton Kurti”.
Derisa gazetari i Klan Kosova, Besnik Tahiri tha se Lista Serbe nuk duhet ta propozojë për nënkryetar të Kuvendit të Kosovës, Slavko Simiqin.
Siç tha ai, ndaj Simiqit ka aktakuzë për sulm ndaj gazetarëve në Leposaviq gjatë vitit 2023.
Lista Serbe duhet të ketë një gjë parasysh dhe këtu duhet të luajnë rol shumë Shtetet e Bashkuara të Amerikës dhe Bashkimi Evropian. Ata duhet ta bindin Listën Serbe që, së pari, të mos shkojë, për hir të asaj që quhet Kosovë multietnike, Kushtetuta e të cilës është ndërtuar mbi atë frymë, të mos e propozojë së pari Slavko Simiqin, kandidat për nënkryetar”.
“Kjo për shkak se ai para disa muajve ka aktakuzë për sulm ndaj gazetarëve në Leposaviq në vitin 2023. Tani ata gazetarë që ishin në Lozhë lartë, do ta shohin potencialisht në Kuvend një person që i ka sulmuar. Po ashtu, përpos Slavko Simiqit, Lista Serbe duhet ta shmangë po ashtu edhe Igor Simiqin dhe Zllatan Ellekun, për shkak se Slavko Simiqi bashkë me këta dy të tjerët dyshohen se janë njerëzit që kanë vendosur barrikadat në vitin 2022 dhe Prokuroria Speciale i ka marrë në pyetje”, ka thënë Tahiri.
