Ish-administratori i Fondit “Vendlindja Thërret”, Haki Morina, e ka komentuar artikullin ku kryetari i Kuvendit, Dimal Basha, është bashkautor, e ku pretendohet se Ushtria Çlirimtare e Kosovës është financuar nga “trafikantë të drogës”.
Morina tha se ky artikull për shumë mërgimtarë ka qenë ofendim i hapur ndaj kontributit të madh që e kanë dhënë ata për luftën dhe çlirimin e Kosovës.
“Në bazë të rrjeteve sociale dhe atyre pak mërgimtarëve që kam takuar del që zbulimi i këtij artikulli ka shkaktuar befasi negative, indinjatë të thellë pasi i ofendon të gjithë ndjenjat patriotike dhe kontributin e madh që e kanë dhënë mërgimtarët gjatë luftës”, ka thënë Morina mbrëmë në Edicionin Special të Klan Kosovës.
“Ndihemi të fyer pasi mohohet drejtpërdrejt i gjithë kontributi ynë me vite radhë, i gjithë kontributi ynë mjaft i vështirë pasi s’ishte e lehtë në atë kohë që të ndaje edhe kafshatën e bukës për të kontribuar në formën që kishim mundësi ta ndihmonim UÇK-në”.
“Ky pamflet antishqiptar natyrisht që nuk mund të pritet mirë nga askush, përveç prej atyre që janë me ndjenja armiqësore ndaj kombi”.
