Partia Demokratike e Kosovës ka thënë se mbledhja e kryesisë së kuvendit, e thirrur për të hënën është e pakuptimtë, pasi sipas tyre, kuvendi nuk është konstituuar ende.
PDK-ja tha se vlerëson se zvarritjet e qëllimshme në procesin e themelimit të institucioneve shtetërore, të shkaktuara nga VV-ja, janë skajshmërisht të rrezikshme për Kosovën.
“Sot, Kryetari i Kuvendit shpalli të përfunduar konstituimin e Kuvendit të Republikës së Kosovës, pa u zbatuar në tërësi Neni 67 i Kushtetutës së Kosovës. Për Partinë Demokratike të Kosovës, Kuvendi ende nuk është i konstituuar, sepse nuk është zgjedhur Kryesia e tij në përbërjen e plotë kushtetuese”.
“Në këto rrethana, PDK e konsideron të pakuptimtë ftesën për takim të Kryesisë së Kuvendit që nuk është konstituuar dhe nuk merr pjesë në takime të tilla, të cilat i shërbejnë vetëm agjendave partiake e jo interesit të shtetit”, thuhet në komunikatën e PDK-së, transmeton Klankosova.tv.
Tutje, PDK-ja tha se Lëvizja Vetëvendosje me veprimet e saj dhe skemat populiste, po dëshmon qartë frikën e saj nga hyrja e ligjshme në afatet kushtetuese për të provuar krijimin e qeverisë së re.
“Kjo qasje, me fajin e tyre, po e shtyn Kosovën drejt një krize të re institucionale, pasojat e së cilës do t’i bartin shteti dhe qytetarët tanë”, thuhet në reagim.
