Një grindje e ashpër midis Donald Trump dhe Elon Musk mbi një projektligj të madh shpenzimesh ka shtuar pasiguritë për të ardhmen e buxhetit të NASA-s, duke vënë në rrezik misionet shkencore dhe programin hapësinor të SHBA-së.
Agjencia hapësinore ka paraqitur kërkesën e saj për buxhet në Kongres, ku parashikohen shkurtime të thella – gati përgjysmim – për projektet shkencore. Rreth 40 misione që janë në zhvillim ose tashmë në orbitë pritet të pezullohen nëse plani kalon.
Në një përshkallëzim të mëtejshëm të tensioneve, presidenti Trump ka kërcënuar të anulojë kontratat federale me kompaninë SpaceX të Elon Musk, e cila është furnizuesi kryesor i NASA-s me raketa Falcon 9 për dërgimin e ekuipazheve dhe pajisjeve në Stacionin Ndërkombëtar Hapësinor. Për më tepër, agjencia ka parashikuar përdorimin e raketës Starship për misione në Hënë dhe më tej në Mars, transmeton BBC.
Dr. Simeon Barber nga Universiteti i Hapur shprehu shqetësime të mëdha mbi ndikimin e pasigurisë së krijuar:
“Shkëmbimet e habitshme, vendimet e nxituara dhe kthesat 180 gradë që kemi parë javën e fundit minojnë vetë themelet mbi të cilat i ndërtojmë ambiciet tona”, tha ai.
Sipas tij, eksplorimi i hapësirës varet nga planifikimi afatgjatë dhe bashkëpunimi i qëndrueshëm ndërmjet qeverisë, industrisë dhe botës akademike – elementë që aktualisht janë në rrezik.
