Presidentja e vendit, Vjosa Osmani, ka reaguar për mospajtimet mes Shtetet e Bashkuara të Amerikës dhe Qeverisë së Kosovës, ku thotë se mund të jenë për disa qasje, por kurrë për qëllimin final. Ajo thotë se të dy anët, si SHBA ashtu edhe Qeveria dëshiron një Kosovë sovrave, të pavarur e shumëetnike.
Por Osmani thotë se koordinimi me aleatët është kyç, dhe moskoordinimi me ta mund të ketë një sukses momental, por pastaj është më i brishtë si sukses.
“Tani mund të dëgjojmë deklarata mospajtimi midis zyrtarëve në ShBA dhe Qeverinë e Kosovës mbi disa prej qasjeve, por asnjëherë përsa i përket qëllimit përfundimtar dhe vlerave fundamentale që i kemi të përbashkëta. Nuk ka asnjë mospajtimi mbi faktin që dy anët duan një Kosovë që është sovrane, e pavarur, në kufijtë aktual të suksesshëm, prosperuese, shumetnikë, të ndërtuara mbi Kushtetutën e saj. Por ndonjëherë qasja drejt ruajtjes e mbajtjes së një Kosove demokratike, të fortë e të drejtë, mund të dallojnë. Mund të ketë diferenca në këtë drejtim, por asnjëherë nuk ka pasur e as sot nuk ka mbi atë se çfarë Kosove duam, cilat janë vlerat”, tha Osmani gjatë pjesëmarrjes si folëse në forumin global të sigurisë, “GLOBSEC 2024” në Pragë të Çekisë, shkruan Reporteri.net.
“Mospajtimi nuk është sa i përket rrugës, ndoshta vetëm shpejtësia me të cilën ecet. Nuk dua të them se krejt situata është e qartë. Kam pasur njëzet vjet përvojë në politikë dhe koordinimi me aleatët është kyç, një prej aspekteve më të rëndësishme të suksesit tonë, sepse kur koordinohemi me aleatët tonë suksesi është më i qëndrueshëm dhe më afatgjatë, dhe kur nuk e bëjmë këtë është vetëm një sukses momental, mund të duket mirë, mund të tingëllojë mirë, por pastaj është më i brishtë si sukses dhe pastaj mund të bëhen hapa prapa. Si presidente ky është qëndrimi që mbajë dhe unë besoj fuqimisht, dhe këtë e kemi parë, e mësuar, kur ke aleanca të fuqishme këtu e ke fuqinë. Fuqia më e madhe si vend bazohet në partneritetin tonë dhe kjo na ka mbajtur të fuqishëm, pavarësisht sfidave, dhe jo secili në Kosovë pajtohet me këtë që them unë. Dallimi midis Kosovës dhe SHBA-së, sa shpejt ecin në një drjetim, nuk është fjala për drjetimin apo destinacionin”, ka thënë Osmani.
Ajo përmendi faktin që 97 % e popullsisë në Kosovë që e shohin vendin amerikan si aleati më primar.
“Marrëdhënia midis SHBA dhe Kosovës është diçka që kemi ndërtuar ndër vite. Na janë gjetur përkrah në periudhën më të errët të vendit, për të shpëtuar popullin e Kosovës nga shfarosja që ishte planifikuar. Ky ka qenë themeli i asaj çfarë kemi ndërtuar për 25 vjet me radhë, por që shkon edhe më tej sepse SHBA-të i kemi parë si lider të botës demokratike dhe liderët kanë qenë shumë të zëshëm në kuptimin e shkeljeve të të drejtave të njeriut në Kosovë”, deklaroi Osmani.
Kujtojmë se dje në orët e pasdites Policia e Kosovës dje zhvilloi një aksion policor në veri të vendit ku mbylli pesë objekte të komunave ilegale. Policia e Kosovës ka njoftuar se aksioni është realizuar bazuar në kërkesën e Ministrisë së Administrimit dhe Pushtetit Lokal, në bashkëpunim dhe koordinim me institucionet përkatëse të Kosovës dhe organeve të drejtësisë.
Policia e Kosovës në njoftimin e saj tha se “Qëllimi i operacionit policor është vendosja e rendit dhe ligjshmërisë dhe ndërprerja e aktiviteteve në pesë objekte të cilat janë shfrytëzuar në cilësi të komunave ilegale, e të cilat janë në kundërshtim me rendin juridik kushtetues”, thuhet në njoftimin e Policisë së Kosovës.
Por zhvillimi i këtij aksioni zhgënjeu tej mase aleatët ndërkombëtarë, ku reaguan Ambasada e SHBA-së në Kosovë, Gjermanisë, Britanisë të Madhe, e Francës si dhe Zyra e BE-së në Kosovë.
Reagim të ashpër bëri edhe ndihmëssekretari amerikan i Shtetit për Çështjet Evropiane dhe Euroaziatike, James O’Brien, i cili se e mbështet deklaratën e Ambasadës së SHBA-së në Prishtinë dhe i bëri thirrje urgjente kryeministrit Albin Kurti që t’i ndalë veprimet e pakoordinuara me miqtë ndërkombëtar.
