Tajlanda dhe Kamboxhia kanë rënë dakord për një armëpushim “të menjëhershëm dhe pa kushte”, njoftoi udhëheqësi malajzian Anwar Ibrahim.
Ibrahim priti kryeministrin në detyrë të Tajlandës Phumtham Wechayachai dhe kryeministrin kamboxhian Hun Manet, të cilët u takuan për negociata armëpushimi në Malajzi, ndërsa përleshjet kufitare midis dy vendeve hynë në ditën e tyre të pestë.
Anwar tha para takimit se të dyja palët do të paraqisnin kushtet e tyre për paqe dhe theksoi rëndësinë e një armëpushimi të menjëhershëm, shkruan euronews.
Kamboxhia dhe Tajlanda kanë fajësuar njëra-tjetrën për fillimin e luftimeve, të cilat filluan të enjten pasi pesë ushtarë tajlandezë u plagosën pas një shpërthimi mine tokësore, përcjell telegrafi.
Konflikti ka vrarë të paktën 35 persona dhe ka zhvendosur më shumë se 260,000 njerëz nga të dyja palët.
Ndryshe, bisedimet vijnë mes thirrjeve ndërkombëtare në rritje për paqe, përfshirë edhe nga presidenti i SHBA-së Donald Trump, i cili paralajmëroi se Uashingtoni do të ndalonte marrëveshjet tregtare me të dy vendet nëse armiqësitë do të vazhdonin.
