Kuvendi i Kosovës ka dalë edhe me njoftim zyrtar për mbledhjen e Kryesisë që është thirrur për të hënën.
Në njoftim bëhet e ditur se ky takim ku janë thirrur katër nënkryetarët e zgjedhur të parlamentit mbahet në orën 13:00.
“Takim konsultativ”, u tha tek pika e rendit të ditës së njoftimit të dërguar nga zyra për media e Kuvendit, njofton Klankosova.tv
Lidhja Demokratike e Kosovës ka thënë se nuk do të marrë pjesë në mbledhjen e së hënës.
Lajmin e ka bërë të ditur shefja e grupit parlamentar të kësaj partie, Hykmete Bajrami.
“Jo, absolutisht sepse konsiderojmë që çdo gjë që ndodh pas mbylljes arbitrate të seancës, pa konstituim të Kuvendit, është antikushtetuese. Nuk do të marrim pjesë”, ka thënë Bajrami, njofton Klankosova.tv.
Ndërkaq, kryetari i PDK-së, Memli Krasniqi deklaroi se do të diskutojë me kolegët e Grupit Parlamentar nëse do të marrin pjesë në takimin e Kryesisë së Kuvendit, e që përbëhet nga kryetari Dimal Basha, dhe nënkryetarët Albulena Haxhiu, Vlora Çitaku, Kujtim Shala dhe Emilja Rexhepi.
Krasniqi shtoi se Çitaku ka legjitimitetin e plotë për të marrë pjesë në këtë takim, megjithëse sipas tij, pasi kryesia nuk është e plotë, atij i duhen diskutime për të marrë vendim, transmeton Klankosova.tv.
As sot nuk u arrit që të zgjidhet nënkryetari i fundit i legjislaturës së nëntë.
Meqenëse nënkryetari i pestë nga komuniteti serb nuk u zgjodh, kryetari i Kuvendit, Dimal Basha tha në përmbyllje të seancës se janë konsumuar të gjitha opsionet.
“Kemi ezauruar edhe pikën e katërt të rendit të ditës, dhe konsideroj që kjo seancë konstituive konsiderohet e përmbyllur”, tha ai, njofton Klankosova.tv.
