“Ua ka ndal tagjinë” – kjo është fjalia që nuk e heqin prej goje eksponentët e VV-së kur duan të sulmojnë kundërshtarët e tyre.
Por, kjo “tagji” e famshme qenka duke u shpërndarë tek të preferuarit e tyre, transmeton Periskopi.
Telekomi i Kosovës, që është në pronësi të qeverisë, ua ka dhënë 200 mijë euro për marketing gjashtë televizioneve të afërta me VV-në.
Televizionet si KTV, Tëvë1, RTK, RTV21, ATV dhe RTV Dukagjini kanë përfituar para përmes kontratave të marketingut me Telekomin e Kosovës.
Më 2 dhjetor të vitit 2024, Telekomi kishte nënshkruar katër kontrata me disa televizione për hapësirë reklamuese, raporton mediumi Shënjestër.
Mediumi Tëvë1 ka nënshkruar kontratë me Telekomin e Kosovës në vlerë mbi 49 mijë euro, ATV në vlerë mbi 19 mijë euro, TV Dukagjini mbi 34 mijë euro, ndërsa KTV mbi 17 mijë euro.
Kurti, në disa paraqitje publike, kishte deklaruar se mediat janë kundër tij sepse VV-ja nuk i paguan, por kjo nuk po del të jetë e vërtetë.
Telekomi, që nga ardhja e Qeverisë Kurti, është përcjellë me skandale të shumta dhe dyshime të mëdha për korrupsion, për të cilat Periskopi ka raportuar kohë pas kohe.
