Gjendja e jashtëzakonshme është shpallur në ishullin grek të Santorinit pas disa ditësh tërmetesh të njëpasnjëshme. Kjo lëvizje vjen pasi një lëkundje me magnitudë 5.2 u regjistrua mbrëmjen e së mërkurës midis ishujve grekë të Amorgos dhe Santorini, më e forta e shënuar në ditët e fundit.
Zyrtarët thanë se dekreti do të jetë në fuqi deri më 3 mars për të adresuar nevojat emergjente dhe menaxhuar pasojat. Më shumë se 11,000 njerëz janë larguar tashmë nga Santorini.
Një tërmet me magnitudë 4.7 u regjistrua gjithashtu në jug-perëndim të Amorgos në orën 07:50 me kohën lokale të së enjtes.
Deri më tani nuk janë raportuar dëme të mëdha në ishull, por autoritetet po përgatiten në rast se do të godasë një tërmet më i madh. Kryeministri grek Kyriakos Mitsotakis pritet të vizitojë Santorinin të premten.
Vasilis Karastathis, drejtor i Institutit Gjeodinamik, i tha transmetuesit shtetëror grek ERT Neës se “sizmiciteti vazhdon me të njëjtin ritëm si ditët e mëparshme, intensiv”.
“Kemi një numër mjaft të lartë tërmetesh me magnitudë mbi 4”, tha ai.
Santorini mirëpret miliona turistë çdo vit, por aktualisht është sezoni i ulët, që do të thotë se banorët dhe punëtorët vendas përbëjnë shumicën e të evakuuarve.
Shpërndaje në
SONDAZH
Loading ...
