18 herë, 18 tentativa, 18 dështime.
Edhe sot, asgjë nuk ndryshoi në Kuvendin e Kosovës. E vetmja gjë që mund të bëjë ndonjë dallim janë minutat sa zgjati seanca, raporton Klankosova.tv.
Lëvizja Vetëvendosje, edhe në këtë seancë, nuk arriti ta çojë përpara procesin e votimit të fshehtë për zgjedhjen e Albulena Haxhiut në postin e kryetares së Kuvendit.
Seanca e radhës u caktua më 21 maj, nga ora 11:00.
Përkundër përpjekjeve dhe thirrjeve për bashkëpunim, bllokada institucionale vazhdon.
As takimi i fundit i presidentes Vjosa Osmani me liderët e partive politike nuk solli asnjë zgjidhje konkrete për të dalë nga ngërçi.
Disa liderë i kërkuan presidentes që të kërkojë interpretim nga Gjykata Kushtetuese lidhur me situatën aktuale, por Osmani u shpreh se këtë hap do ta ndërmarrë vetëm nëse zvarritet edhe më tej konstituimi i Kuvendit.
