Bashkimi Evropian (BE) u ka dorëzuar edhe zyrtarisht një kopje në gjuhën angleze të draft-statutit të Asociacionit të komunave me shumicë serbe edhe partive opozitare në Kosovë.
Nga Partia Demokratike e Kosovës (PDK), e kanë konfirmuar për Gazeta Metro se e kanë pranuar draftin e Asociacionit.
Faton Abdullahu për Metron tha se dje e kanë pranuar një kopje të tij.
“Partia Demokratike e Kosovës dje e ka pranuar një kopje të draftit të Statutit të Asociacionit të Komunave me Shumicë Serbe nga Zyra e të Dërguarit Special të BE-së për dialogun Kosovë-Serbi”, tha Abdullahu.
Gjithashtu nga Aleanca për Ardhmërinë e Kosovës kanë konfirmuar për Gazeta Metro, se dje ditën e enjte u është dorëzuar një kopje e draft statutit të Asociacionit.
Zëdhënësi i AAK’së, Kushtrim Xhemaili tha për Metron kjo parti do t’i japë komentit lidhur me draft-statutin pasi ta diskutojnë në organet e partisë.
“Po, mund të ju konfirmoj që dje na është dorëzuar një kopje e draft-statutit të Asociacionit, në gjuhën angleze. Ndërsa, komentet tona për këtë dokument do t’i shpalosim pas diskutimeve në organet e partisë”, tha ai.
Një konfirmim të tillë e ka bërë edhe LDK. Zëdhënësja e kësaj partie, Sibel Halimi, ka konfirmuar për Metron se dje zyrtarisht e kanë pranuar një kopje të draftit të Asociacionit.
Draft-statuti i Asociacionit i është prezantuar fillimisht kryeministrit Albin Kurti gjatë vizitës së pesëshes evropiane në Prishtinë gjatë muajit tetor, e ku ishte i pranishëm edhe i dërguari i BE-së për dialogun Kosovë-Serbi, Miroslav Lajçak.
Ndërkaq, pas vizitës në tetor, Lajçak po ashtu ishte për vizitë në Kosovë më 7 nëntor, ku takoi përfaqësuesit e partive opozitare lidhur me draft-statusin e Asociacionit të komunave me shumicë serbe.
