Nëse duhet të udhëtoni drejt, përmes, apo nga Los Angelesi së shpejti, a është e sigurt të shkoni?
Një javë pas shpërthimit të zjarreve shkatërruese në Los Angeles, mund të mendoni se situata tashmë është zgjidhur.
Por, paralajmërimet e përditshme për erëra të forta tregojnë se më e keqja nuk ka kaluar ende për banorët e LA-së.
Për vizitorët, nuk ka pasur ndonjë mesazh zyrtar nga autoritetet kaliforniane për të shmangur udhëtimin.
Zyra e jashtme e Mbretërisë së Bashkuar thotë thjesht se “zjarre të shpejta dhe të përhapura janë aktualisht aktive brenda Qarkut të Los Angelesit. Duhet të monitoroni mediat lokale dhe të ndiqni këshillat e autoriteteve vendase”.
Pra, nëse duhet të udhëtoni drejt, përmes apo nga Los Angelesi së shpejti, a është e sigurt të shkoni?
A janë anuluar fluturimet në LAX?
Aeroporti Ndërkombëtar i Los Angelesit (LAX) zakonisht ka rreth 700 fluturime në ditë. Ai ndodhet rreth 17 km larg zjarrit në Palisades, por ka qëndruar i hapur gjatë gjithë krizës.
Një deklaratë në faqen e aeroportit thotë se “LAX është i hapur dhe funksionon normalisht. Pasagjerët duhet të kontrollojnë statusin e fluturimeve direkt me linjat e tyre ajrore”.
Nuk janë raportuar vonesa të pazakonta në LAX dhe të gjitha shërbimet po funksionojnë normalisht, megjithëse disa pasagjerë kanë parë nga lart shkatërrimin e shkaktuar nga zjarret. Disa linja ajrore nuk po taksojnë pasagjerët për të ndryshuar fluturimet e tyre. Këto përfshijnë linjat kryesore amerikane si American Airlines, Delta Air Lines dhe United Airlines. Southwest dhe JetBlue gjithashtu nuk po aplikojnë tarifa.
Përveç LAX, aeroportet e afërta si Hollywood Burbank, Ontario dhe Santa Ana John Wayne janë gjithashtu të hapura dhe përfshihen në përjashtimet nga tarifat e linjave ajrore. Po ashtu, fluturimet nuk janë vonuar për shkak të zjarreve, megjithëse erërat e forta shkaktuan disa ndërprerje javën e kaluar.
Nëse do të kishte ndonjë rrezik lidhur me fluturimet nga LAX, FAA dhe autoritetet e aeroportit do t’i ndalonin fluturimet. Kështu që, është e sigurt të fluturoni drejt dhe nga Los Angelesi për momentin, por nëse dëshironi ta bëni këtë, është çështje tjetër.
A është e sigurt të vizitosh Los Angelesin?
Në varësi të vendit ku planifikoni të shkoni, disa zona nuk janë aspak të sigurta për t’u vizituar. Zjarret janë përqendruar në veri të qytetit, ku zjarri më i madh në Palisades ka përfshirë më shumë se 97 mijë metra katrorë.
Zona të tjera të Qarkut të Los Angelesit janë gjithashtu prekur, duke përfshirë edhe afër destinacionit turistik Sunset Boulevard, transmeton Telegrafi.
Një emergjencë shëndetësore u shpall më 11 janar për shkak të tymit. Disa furnizime me ujë janë ndotur dhe njerëzve u është thënë të mos notojnë në det.
Tymi nga zjarret është jashtëzakonisht i rrezikshëm për shëndetin, me ekspozimin e shkurtër që mund të shkaktojë gjendje serioze dhe afatgjata.
A është i mbyllur Disneyland në LA?
Deri më 15 janar, disa nga atraksionet kryesore që mbeten të mbyllura përfshijnë:
Warner Bros. Studio
The Getty Center
Muzeu Hammer
Muzeu i Historisë Natyrore
Muzeu i Artit Bashkëkohor
Shkronjat e Hollywoodit dhe shtigjet për ecje
Disneyland dhe Universal Studios janë ende të hapura. Disney publikoi një deklaratë javën e kaluar duke thënë se “nëse planifikoni një pushim në Disneyland, nuk ka nevojë të anuloni përveç nëse planifikoni të kaloni një pjesë të madhe të udhëtimit në zonën e LA-së”.
Airbnb po ofron strehim të përkohshëm falas për banorët e zhvendosur, por kërkesa është e lartë.
Humbja e parave për akomodim jo të rimbursueshëm është e pakëndshme, por pasi dikush ndoshta ka nevojë për atë dhomë, këshilla më e mirë është të telefononi hotelin tuaj dhe të shpjegoni situatën.
A është e sigurt të ngasësh në Los Angeles?
Trafiku në qytet është lehtësuar ndjeshëm që nga radhët e para për evakuim javën e kaluar. Megjithatë, shumë rrugë janë të mbyllura dhe mbylljet ndodhin shpesh pa paralajmërim.
Caltrans, Departamenti i Transportit i Kalifornisë, po përditëson rregullisht shoferët përmes mediave sociale për rrugët e mbyllura. Ky departament u ka bërë thirrje shoferëve që “të kufizojnë udhëtimet jo të domosdoshme dhe të qëndrojnë larg” nga zonat e prekura.
Edhe pse nuk ka pasur një urdhër zyrtar për të mos udhëtuar me veturë në Qarkun e Los Angelesit, KQED raporton se anëtari i këshillit Marqueece Harris-Dawson tha në një konferencë për shtyp të mërkurën se “nëse nuk keni një arsye të mirë për të qenë në rrugë, ju kërkojmë që t’i lini rrugët sa më të lira për profesionistët e sigurisë publike që duhet të kryejnë punën e tyre dhe të na nxjerrin nga kriza që po përjetojmë”.
Dhjetëra mijëra njerëz janë aktualisht të zhvendosur nga shtëpitë e tyre dhe do të përdorin rrugët për t’u kthyer në shtëpi në një moment. Po ashtu, nëse një zjarr tjetër shpërthen ose përhapet, rrugët do të bllokohen shpejt nga banorët që evakuohen.
A po funksionon transporti publik në Los Angeles?
LA Metro dhe Amtrak janë funksionale, por po fokusojnë shërbimet e tyre për ata që janë prekur nga zjarret.
LA Metro po ofron udhëtime falas në të gjithë sistemin deri sa zjarret të jenë nën kontroll. Faqja e saj zyrtare thotë se “ne po operojmë me disa ndikime në shërbimin e disa linjave autobusësh për shkak të zjarreve. Të gjitha linjat hekurudhore janë në funksion të rregullt. Gjithashtu, ne po vazhdojmë të ofrojmë udhëtime falas në të gjithë sistemin sa kohë që ekzistojnë kushtet e zjarreve”.
Amtrak po mbështet gjithashtu përpjekjet e evakuimit, duke ofruar bileta me çmim 11 euro për udhëtim kudo midis San Diego dhe San Luis Obispo deri më 24 janar.
Mbi 100 mijë njerëz janë nën urdhra të detyrueshme për evakuim në Qarkun e Los Angelesit, ndërsa 89 mijë të tjerë janë nën paralajmërime për evakuim. Shumë prej tyre do të mbështeten te autobusët dhe trenat për të hyrë dhe dalë nga qyteti.
Përveçse është i ngarkuar, situata me transportin publik mund të ndryshojë shpejt. Anulimet dhe mbylljet do të bëhen pa shumë paralajmërim për të mbajtur udhëtarët të sigurt, ndaj kini këtë parasysh nëse planifikoni të udhëtoni me autobus ose tren.
Si të informoheni për situatën aktuale të zjarreve në Los Angeles
Nëse udhëtimi juaj është pas disa ditësh apo javësh, mund të dëshironi të kontrolloni situatën aktuale afër datës së udhëtimit.
Departamenti i Pyjeve dhe Mbrojtjes nga Zjarret (CAL FIRE) ofron një panel live dhe në kohë reale që tregon vendndodhjen e zjarreve dhe sa mirë janë kontrolluar ato.
Gjithashtu, ky panel tregon zonat e mbuluara nga paralajmërimi i flamurit të kuq. Ky është një paralajmërim i lëshuar nga Shërbimi Kombëtar i Motit në SHBA për të informuar kur kushtet janë të favorshme për ndezjen dhe përhapjen e zjarreve.
Gjatë kohës kur një zonë është nën paralajmërim me flamur të kuq, banorët, zjarrfikësit dhe agjencitë e menaxhimit të tokës janë në gatishmëri të lartë.
Kjo nuk do të thotë që nuk duhet të vizitoni zonën, por nëse vendosni ta bëni, është e rëndësishme të jeni të vetëdijshëm se autoritetet dhe banorët lokalë do të jenë jashtëzakonisht të zënë dhe të stresuar.
Shpërndaje në
SONDAZH
Loading ...
