Ministri i Mbrojtjes, Ejup Maqedonci ka reaguar pas publikimit të letrës së tij drejtuar komandantit të KFOR-it lidhur me prezencën e FSK-së në veri, në të cilën shkruhet se FSK-ja do të shkojë në atë zonë vetëm me konsultim paraprak me KFOR-in, duke konfirmuar dhe u pajtuar me letrën që ia kishte dërguar kohë më parë NATO-s ish-kryeministri Hashin Thaçi.
Ai ka thënë se letra e plotë e publikuar nuk është asgjë e re, por një qëndrim i sqaruar më parë dhe së ajo është sqarim e jo rizotim.
“Letra në fjalë është dërguar me qëllimin që t’i sqarohen Komandantit të KFOR-it rrethanat e angazhimit të një njësie të FSK-së në njërën nga komunat në veri të vendit, si dhe ta siguroj atë që nuk ka pasur për qëllim në asnjë rast tensionimin e situatës. Në asnjë mënyrë, letra nuk paraqet rizotim dhe nuk mund të interpretohet si rizotim, pasi për angazhimin e FSK-së në veri të Kosovës, ekziston një dokument në fuqi i dhënë si zotim nga ish-Kryeministri Thaçi në prill të vitit 2013, dërguar Sekretarit të Përgjithshëm të NATO-s, nga i cili derivojnë dhe kushtet e operimit e të koordinimit të FSK-së dhe KFOR-it për pjesën veriore të Kosovës”, ka shkruar Maqedonci.
Maqedonci tutje ka përsëritur se nuk pajtohet personalisht me zotimin që FSK-ja të shkojë në veri vetëm me koordinim paraprak me KFOR-in.
“E ritheksoj, ashtu siç e kam thënë në çdo paraqitje timen publike, që personalisht nuk pajtohem me atë zotim, pasi vazhdoj të mendoj se ka qenë zotim i gabuar dhe i dëmshëm për ushtrinë tonë, si dhe me pasoja afatgjata. Mirëpo ashtu siç e kemi deklaruar si Ministri e Mbrojtjes dhe si Qeveri e Kosovës, letrën zotuese të vitit 2013 do ta respektojmë, sepse jemi të përgjegjshëm karshi obligimeve të trashëguara institucionale për aq kohë sa janë në fuqi”, ka thënë ai.
Shpërndaje në
SONDAZH
Loading ...
