Kina njoftoi të dielën se do të rifillojë menjëherë importet e prodhimeve detare nga disa rajone të Japonisë, duke i dhënë fund një ndalimi të përgjithshëm dyvjeçar që ishte vendosur për shkak të shqetësimeve mbi shkarkimin e ujërave të trajtuara nga centrali bërthamor i Fukushimës.
Sipas një njoftimi të Doganave të Kinës, ndalimi do të vazhdojë për produktet e detit nga dhjetë prefektura japoneze: Fukushima, Gunma, Tochigi, Ibaraki, Miyagi, Niigata, Nagano, Saitama, Tokio dhe Chiba.
Produktet nga rajonet e tjera të Japonisë do të lejohen të eksportohen në Kinë vetëm nëse shoqërohen me certifikata shëndetësore, certifikata për zbulimin e substancave radioaktive dhe dokumente të origjinës së prodhimit, të gjitha të lëshuara nga qeveria japoneze.
Autoritetet kineze thanë se vendimi u mor pasi, pas monitorimeve të gjata ndërkombëtare dhe testimeve të pavarura kineze, nuk u zbuluan anomali në ujin e shkarkuar.
Kina kishte ndaluar importet e të gjitha prodhimeve të detit nga Japonia në gusht 2023, pak pasi Japonia filloi të lëshojë në det ujërat e trajtuara të centralit bërthamor, duke shkaktuar një përplasje diplomatike dhe ekonomike.
Në njoftimin e fundit, Kina deklaroi se do të vazhdojë mbikëqyrjen e rreptë të importeve japoneze dhe do të ndërmarrë masa nëse konstatohen shkelje të ligjeve dhe standardeve kineze të sigurisë ushqimore.
