Një sasi prej 27 kilogramësh lëndë narkotike është zbuluar nga autoritetet italiane në një apartament në Vigevano, në veri të Italisë.
Droga u zbulua pas një operacioni të Karabinierëve të Njësisë së Operacioneve të Kompanisë së Qendrës së Xhenovës.
Gjatë hetimeve, policia kishte vërejtur sjellje të dyshimta nga një 29-vjeçar shqiptar, të cilin e ndoqën deri te banesa e tij.
Pasi e ndaluan, atij iu gjetën 58 gramë kokainë në posedim, çka çoi në një kontroll të detajuar në apartament.
Në banesë u gjetën 22 kilogramë hashash të ndara në 122 pako, të cilat ndodheshin brenda një frigoriferi.
Përveç kësaj, u zbuluan edhe 5 kilogramë kokainë, të fshehura në vende të ndryshme dhe të vulosura me imazhin e aktorit Al Pacino në rolin e tij në filmin “Scarface”, një simbol që përdoret shpesh nga trafikantët për të shënuar mallin.
Po ashtu, efektivët sekuestruan rreth 7 mijë euro në para të gatshme, që dyshohet se janë të ardhura nga aktiviteti i trafikut të drogës.
29-vjeçari u arrestua menjëherë dhe është dërguar në burgun e Pavias. Hetimet ndaj tij janë ende në zhvillim.
