Izraeli beson se Irani mund të rimarrë uraniumin e pasuruar nën njërën nga tre objektet e goditura nga forcat amerikane muajin e kaluar, sipas një zyrtari të lartë izraelit.
Zyrtari u tha gazetarëve amerikanë se arritja e uraniumit të pasuruar në Isfahan do të ishte jashtëzakonisht e vështirë dhe çdo përpjekje do të shkaktonte sulme të reja izraelite.
Presidenti i SHBA-së, Donald Trump, ka pohuar vazhdimisht se sulmet ajrore dhe raketore të ShBA-së ndaj Iranit në qershor “shkatërruan” objektet bërthamore të vendit, edhe pse disa agjenci të inteligjencës amerikane kanë mbajtur një qëndrim më të kujdesshëm.
Irani mohon se kërkon të zhvillojë armë bërthamore dhe thotë se pasurimi i uraniumit është për qëllime paqësore.
Zyrtari i lartë izraelit – i cili nuk pranoi të identifikohej – tha në një konferencë për shtyp në Washington se inteligjenca tregonte se pjesa më e madhe e uraniumit të pasuruar të Iranit ishte në Isfahan, i cili u godit nga raketa lundrimi të lëshuara nga nëndetëset gjatë “Operacionit Midnight Hammer” më 22 qershor.
Megjithatë, zyrtari nuk shprehu shqetësim në lidhje me vlerësimin, duke vënë në dukje se çdo përpjekje iraniane për të rikuperuar materialin ndoshta do të zbulohej.
Sipas zyrtarit, vlerësimi i Izraelit është se programi bërthamor i Iranit është kthyer dy vjet prapa.
Trump dhe anëtarët e administratës së tij kanë qenë të bindur se objektet bërthamore iraniane u shkatërruan plotësisht, shkruan BBC.
