Para pak ditësh, presidentja e Kosovës, Vjosa Osmani është kërcënuar me jetë nga një person. Dikush dërgoi një mesazh në adresën elektronike të presidencës duke e kërcënuar me jetë të parën e shtetit.
Lidhur me këtë rast, Klankosova.tv ka kontaktuar Prokurorinë Speciale.
Në përgjigjen e Prokurorisë Speciale thuhet se ka autorizuar policinë për identifikimin dhe zbulimin e kryerësit të mundshëm të veprës penale.
“Prokuroria Speciale e Republikës së Kosovës, ka pranuar informacion nga Policia e Kosovës lidhur me rastin konkret. Në kuadër të kësaj ka autorizuar Njësinë përkatëse të policisë që t’i ndërmarrë të gjitha veprimet e nevojshme lidhur me identifikimin dhe zbulimin e kryersit të mundshëm të veprës penale”, thuhet në përgjigjen e PS-së.
