Ministri i informacionit për Kashmirin e administruar nga Pakistani tha se 11 persona u vranë, përfshirë një fëmijë, dhe 56 të tjerë u plagosën në bombardimet “intensive” indiane gjatë natës përgjatë Vijës së Kontrollit (LoC).
“Mbrëmë, bombardime intensive nga pala indiane ndodhën në më shumë se pesë vende të ndryshme përgjatë Vijës së Kontrollit”, tha të shtunën Pir Mazhar Saeed Shah.
“Si rezultat, 11 persona, përfshirë një fëmijë dhe katër gra, humbën jetën dhe 56 të tjerë u plagosën.”
Ai vazhdoi duke thënë se, deri më tani, 1,014 persona janë zhvendosur nga LoC – kufiri de facto që ndan pjesët e administruara nga India dhe Pakistani të territorit të diskutueshëm që ka qenë një pikë e nxehtë në armiqësitë e fundit – në zona më të sigurta, raporton CNN, transmeton Klankosova.tv.
Në Kashmirin e administruar nga Pakistani, bombardimet indiane kanë dëmtuar 235 shtëpi, 29 prej të cilave janë shkatërruar plotësisht, tha Shah. Ai shtoi se dy spitale të vogla përgjatë vijës kufitare u shënjestruan gjithashtu nga bombardimet indiane, duke shkaktuar dëme të pjesshme strukturore në ndërtesa.
Përballja e fundit midis Indisë dhe Pakistanit vazhdoi të shtunën, me Islamabadin që nisi një operacion ushtarak në hakmarrje ndaj asaj që i quajti sulme indiane në bazat e saj ushtarake gjatë natës. Ushtria e Indisë tha se “u kundërpërgjigj në mënyrë efektive” ndaj operacionit të Pakistanit.
