Presidenti iranian Masoud Pezeshkian tha të hënën se vendi i tij nuk dëshiron të “zgjerojë rrethin e luftës” me Izraelin, por do të përgjigjet “në mënyrë proporcionale” ndaj çdo sulmi, shkruan CNN.
Pezeshkian i bëri këto deklarata gjatë një bisede telefonike me Presidentin turk Recep Tayyip Erdogan të hënën, sipas agjencisë shtetërore të lajmeve të Iranit.
Sipas Pezeshkian, “agresioni” izraelit ka shkaktuar vdekjen e civilëve, shkencëtarëve dhe udhëheqësve ushtarakë në Iran. “Irani nuk e ka nisur këtë luftë, por do të përgjigjet në mënyrë proporcionale me nivelin e sulmit.”
Ai shtoi gjithashtu se pjesëmarrja e Iranit në bisedimet bërthamore me Shtetet e Bashkuara “varet vetëm nga ndalimi i sulmeve të regjimit sionist ndaj vendeve të rajonit.”
Erdogan i tha Pezeshkianit se Turqia është e gatshme “të luajë një rol lehtësues për të ndihmuar në uljen e tensioneve dhe për të mbështetur rikthimin në negociatat bërthamore,” sipas agjencisë shtetërore të lajmeve të Turqisë.
