Sekretari amerikan i Shtetit, Marco Rubio, tha se shprehu zhgënjimin e Shteteve të Bashkuara që nuk është bërë më shumë përparim në përfundimin e luftës në Ukrainë në një takim të enjten me homologun rus Sergei Lavrov.
“Ishte një bisedë e sinqertë. Ishte e rëndësishme”, tha Rubio gjatë bisedimeve të tij 50-minutëshe me ministrin e Jashtëm rus në kuadër të takimit të ministrave të jashtëm të ASEAN në Malajzi.
Ai tha se i shprehu Lavrovit atë që presidenti i ShBA-së Donald Trump e ka thënë publikisht, “se nuk ka pasur më shumë fleksibilitet nga pala ruse për t’i dhënë fund këtij konflikti”.
Takimi i dytë ballë për ballë i të dërguarve erdhi mes sulmeve të intensifikuara ruse në Ukrainë. Trump është bërë gjithnjë e më i frustruar – dhe publikisht – me Presidentin rus Vladimir Putin ndërsa lufta vazhdon.
Rubio tha se ai dhe Lavrov ndanë disa ide, duke përfshirë “një qasje të re ose të ndryshme” nga pala ruse, të cilat ai do t’ia përcjellë Trumpit pas kthimit të tij.
“Ne duhet të shohim një plan veprimi për të ecur përpara se si mund të përfundojë ky konflikt”, tha Rubio.
Dronët dhe raketat ruse u nisën drejt kryeqytetit ukrainas herët të enjten, ndërsa sulmet ruse në rritje kanë tendosur mbrojtjen ajrore ukrainase, duke detyruar mijëra njerëz të futen në strehimore kundër bombave gjatë natës.
Presidenti ukrainas Volodymyr Zelenskiy tha se Rusia kishte lëshuar 18 raketa dhe rreth 400 dronë në një sulm që synonte kryesisht kryeqytetin Kiev.
Nuk pati asnjë koment nga Moska, e cila natën e kaluar lëshoi një rekord prej 728 dronësh drejt fqinjit të saj më të vogël.
