Kryetari i Drenasit, Ramiz Lladrovci ka falënderuar të gjithë ata që e përkrahën, pas vendimit të kryesisë së PDK-së, rreth kandidaturës së tij.
Lladrovci nuk është rizgjedhur që të kandidojë për kryetar të Drenasit, derisa nga PDK do të garojë Petrit Hajdaraj, transmeton Klankosova.tv.
E përmes një postimi në Facebook, ai tha se puna e tij ka simpatinë e jo vetëm të qytetarëve të Drenasit, por gjithandej trojeve shqiptare.
Krejt në fund, i pari i Drenasit ripërsërit se bashkë me qytetarët e qytetit vazhdojnë përpara, plus katër vjet.
Postimi i plotë i Ramiz Lladrovcit:
Falënderim!
Falënderoj qytetarët, miqtë, dashamirët dhe përkrahësit për mijëra mesazhe dhe telefonata përkrahëse, pas vendimit të Kryesisë së PDK-së, rreth kandidaturës time.
Dua të shpreh mirënjohjen time të thellë dhe konsideratën për të gjithë, në pamundësi veç e veç t’ju përgjigjem ndaj mesazheve në të gjitha rrjetet sociale dhe telefonatat.
Në veçanti shpreh keqardhje për mosmundësi t’i përgjigjem mediave të cilat kanë ndjekur punën time ndër vite.
E kam ditur se puna ime me përkushtim, sinqeriteti dhe vendosmëria për qeverisjen shembullore dhe me duar të pastra, pa iu nënshtruar keqbërësve e merr përkrahjen dhe simpatinë jo vetëm nga qytetarët e komunës së Drenasit por gjithandej trojeve shqiptare.
Faleminderit, bashkë, vazhdojmë, +4!
