Sekretari i Jashtëm i Britanisë së Madhe, David Lammy, ka shprehur shqetësimin e tij për përshkallëzimin e konfliktit midis Izraelit dhe Iranit, duke e cilësuar situatën alarmante.
“Jemi të alarmuar nga përshkallëzimi i situatës në Lindjen e Mesme, ku janë raportuar viktima dhe të plagosur në Izrael. Duhet të ndërmarrim masa urgjente për de-eskalim dhe të parandalojmë më shumë dëm për civilët,” ka deklaruar Lammy në një postim në X.
Ai gjithashtu ka theksuar se ka komunikuar me homologun iranian, Abbas Araghchi, për të inkurajuar qetësinë.
Si pasojë e sulmit me raketa balistike të Iranit ndaj Izraelit, janë raportuar tre civilë të vrarë dhe 70 të tjerë të plagosur.
Nga ana tjetër, autoritetet iraniane ende nuk kanë ofruar një bilanc të saktë të viktimave pas sulmeve ajrore të Izraelit, të cilat goditën objektet e infrastrukturës ushtarake dhe bërthamore të Iranit.
Sipas raportimeve nga mediat britanike, Britania e Madhe nuk ishte e njoftuar paraprakisht nga Izraeli për sulmin që ky i fundit realizoi ndaj Iranit, të cilin e justifikoi si një veprim për të goditur pikat që janë të dyshuara për prodhimin e armëve bërthamore.
