Ambasada e Shteteve të Bashkuara të Amerikës në Kosovë i ka dhënë më shumë prioritet një vizite për bashkëpunimin ekonomik mes ShBA-së dhe Kosovës, sesa zhvillimeve në Kuvendin e Kosovës në përpjekje për formimin e institucioneve të reja.
Në kohën sa po zhvillohej seanca në Kuvend, e ngarkuara me punë në Ambasadën amerikane në Prishtinë, Anu Prattipati, ka zhvilluar një vizitë tek “Devolli Corporation” në Pejë, ku është pritur nga biznesmeni Shkëlqim Devolli. Ndërkohë, në punimet e seancës konstituive, Ambasadën e ka përfaqësuar ushtruesi i detyrës së zëvendësshefit të misionit, Ralan Hill, që është vartës i saj.
Kësaj vizite, ambasada i ka dhënë prioritet edhe nëpër rrjete sociale.
Në rrjetet sociale të ambasadës është shpërndarë njoftimi për këtë vizitë, teksa për pjesëmarrjen e Hill në seancën e paraparë për konstituimin e Kuvendit nuk ka asnjë njoftim publik.
Tek njoftimi i ambasadës për vizitën thuhet se “Prince Coffee” është shembull i shkëlqyer i bashkëpunimit në biznes mes ShBA’së dhe Kosovës.
“Prince Coffee është një shembull i shkëlqyer i bashkëpunimit të biznesit SHBA-Kosovë – deri më sot ajo ka investuar në ekonominë e SHBA-së duke punësuar afro 100 njerëz në lokacionet e saj të kafeneve në SHBA! I Ngarkuari me Punë Anu Prattipati dhe përfaqësues të Ambasadës vizituan fabrikën e Princ Coffee në Pejë dhe diskutuan mënyrat për të forcuar më tej lidhjet ekonomike SHBA-KS. Vizita riafirmoi mbështetjen për kompanitë kosovare që kërkojnë të investojnë në Shtetet e Bashkuara dhe theksoi mundësitë e reja për bizneset kosovare për t’u lidhur me kompanitë amerikane përmes #SelectUSA #PreferredPartnerUSA”, thuhet në njoftim.
Seanca konstituive e Kuvendit ka dështuar sot, pasi raporti i Komisionit të përkohshëm për verifikimin e kuorumit dhe të mandateve nuk mori votat e mjaftueshme të deputetëve.
Në këto rrethana dhe pas konsultimit të partive, kryesuesi i seancës, Avni Dehari, ndërpreu punimet dhe deklaroi se do t’i drejtohen Presidentes Vjosa Osmani, se si të veprohet më tutje.
Deri tani, në adresë të Osmanit nuk ka shkuar asnjë letër.
Në këtë seancë duhej që deputetët, pas miratimit të raportit, të bënin betimin dhe të zgjidhinin kryetarin dhe nënkryetarët.
