Raportohet për disa viktima nga të shtënat të enjten në Universitetin Shtetëror të Floridës dhe një i dyshuar u arrestua nga policia, tha një person i njohur me çështjen për “Associated Press”.
Shkalla e lëndimeve të viktimave nuk dihej menjëherë dhe nuk kishte detaje shtesë për personin në paraburgim, sipas personit që nuk ishte i autorizuar të diskutonte publikisht detajet e hetimit, i cili për AP foli në kushte anonimiteti.
Të paktën gjashtë persona po trajtoheshin në spital, duke përfshirë një person që ishte në gjendje kritike, tha një zëdhënës i Tallahassee Memorial HealthCare. Pacientët e tjerë ishin në gjendje të rëndë, tha zëdhënësi.
Autoritetet nuk kishin dhënë ende detaje në lidhje me të dyshuarin apo se si rrodhën të shtënat.
Ambulancat, zjarrfikësit dhe automjetet e patrullimit nga agjencitë e shumta të zbatimit të ligjit vrapuan drejt kampusit që ndodhet në perëndim të kryeqytetit të shtetit të Floridës, pasi universiteti lëshoi një alarm aktiv për të shtënat mesditën e së enjtes. Qindra studentë u larguan nga zona.
Ryan Cedergren, një student 21-vjeçar i komunikimit, tha se ai dhe rreth 30 të tjerë u fshehën në sallën e “bowlingut” në nivelin më të ulët të kampusit pasi panë studentë që vraponin nga një lokal aty pranë.
