Posedimi i armëve ilegale është një dukuri shqetësuese në vendin tonë, pasi që Policia vazhdimisht has në persona të armatosur të cilët cenojnë sigurinë e qytetarëve dhe rrezikojnë jetën e tyre. Ata shpesh kapen në flagrancë me armët, me të cilat sillen lirshëm.
Një rast i tillë është zbuluar mbrëmë në Podujevë, ku një 15-vjeçar nga fshati Bellopojë ka përfunduar në prangat e Policisë, pasi u kap me një armë të cilën e posedonte ilegalisht.
Burimet e Kosovalive bëjnë të ditur se njësitet policore kishin siguruar informacione se i mituri mund të posedonte armë zjarri dhe në koordinim me Prokurorin e Shtetit kanë ndërmarrë veprimet e nevojshme.
Gjatë kontrollit, tek i dyshuari është gjetur dhe konfiskuar një pistoletë me gas me një karikator, por pa fishekë.
Policia ka kontrolluar edhe shtëpinë e tij, por nuk ka gjetur diçka tjetër të dyshimtë.
I mituri është intervistuar në prani të prindit dhe avokatit mbrojtës, ndërsa me urdhër të Prokurorit është dërguar në mbajtje për 24 orë.
Rasti po vazhdon të hetohet nga organet kompetente.
