Delegacioni i Bashkimit Evropian ka ngritur kritika të ashpra lidhur me keqmenaxhimin e mbeturinave në Maqedoninë e Veriut, duke theksuar se, pavarësisht përpjekjeve të shumta, situata mbetet problematike.
Steffen Hudolin, Shef i Bashkëpunimit në Delegacionin e BE-së, tha se pavarësisht angazhimeve të mëdha, ka pasur shumë pak progres në vitet e fundit. Ai theksoi se një pjesë e madhe e mbeturinave përfundojnë në deponi të pasistemuara, ndërsa 30% e tyre shpërndahen kudo. Hudolin shtoi se, megjithë alokimin e fondeve gjatë 8 viteve të kaluara, shumë pak është arritur në përmirësimin e situatës.
Ambasadorja e Suedisë në Shkup, Ami Larsson Jain, nënvizoi rëndësinë e vendosjes së një sistemi të duhur të menaxhimit të mbeturinave. Ajo propoziosi përfshirjen e shoqërisë civile dhe edukimin e brezave të rinj për riciklim, duke ndarë përvojën pozitive të Suedisë në këtë fushë.
Nga ana tjetër, Ministria e Mjedisit ka theksuar se rregullativa për menaxhimin e mbeturinave është e harmonizuar me legjislacionin e BE-së dhe se nuk ka lëshime në këtë aspekt. Megjithatë, Ana Karanfillova Mazevska, Përfaqësuese e Ministrisë, theksoi se problemi qëndron te mungesa e implementimit të rregullativave.
