Policia e Kosovës ka raportuar dy raste ku qytetarët kanë hasur në mjete të dyshuara të pashpërthyera në rajonin e Ferizajt.
Rasti i parë është raportuar në Ferizaj, rreth orës 14:11, ku një qytetar ka njoftuar për një mjet të dyshuar.
Në vendin e ngjarjes kanë dalë njësitë për deminim të KFOR-it dhe të Forcës së Sigurisë së Kosovës (FSK), të cilat kanë kryer shpërthimin e kontrolluar të mjetit, bëhet e ditur në raportin 24-orësh të policisë, transmeton Klankosova.tv.
Rasti tjetër ka ndodhur në Kaçanik, rreth orës 20:30, ku gjithashtu një qytetar ka hasur në një mjet të dyshuar të pashpërthyer.
Edhe në këtë rast ka ndërhyrë njësiti i deminimit i FSK-së, i cili ka bërë shpërthimin e sigurt dhe të kontrolluar të mjetit.
