Franca ka “dënuar ashpër shtimin e veprimeve të njëanshme të autoriteteve kosovare në veri të vendit, të cilat ndikojnë në jetën e përditshme të komunitetit serb”.
Kështu është thënë në një reagim të Ministrisë së Jashtme të Francës, të publikuar sot, raporton Klankosova.tv.
“Këto veprime rrezikojnë përpjekjet për normalizimin e marrëdhënieve me Serbinë para realizimit të perspektivës evropiane të dy vendeve”, ka thënë ministria e Jashtme e Francës.
Franca u ka bërë thirrje autoriteteve kosovare që “të përmbahen nga çdo veprim i mëtejshëm i njëanshëm, i cili do të kontribuonte më tej në përshkallëzimin e tensioneve”.
Franca “inkurajon të dyja palët që të kthehen në tryezën e bisedimeve, nën mbështetjen e Bashkimit Evropian, në mënyrë që të bëjnë përparim në zbatimin e Marrëveshjes Bruksel-Ohër”.
Ky reagim i Francës vjen në vazhdën e reagimeve nga partnerët ndërkombëtarë të vendit që kanë kundërshtuar veprimet e fundit të qeverisë në pjesën veriore të vendit.
Këto veprime përfshijnë mbylljen e 9 pikave ilegale të Postës së Serbisë, e më pas edhe vendimin për të testuar urën e Ibrit, e cila sipas qeverisë, duhet të hapet.
Këto veprime, nga partnerët janë konsideruar si veprime të njëanshme.
