Gjermania ka rihapur ambasadën e saj në Siri të enjten, duke shënuar një rikthim të marrëdhënieve diplomatike me Damaskun, pas ndryshimit të pushtetit në vend.
Ky zhvillim vjen ndërsa Siria përballet me probleme humanitare dhe sfida të mëdha sigurie, pas rrëzimit të Bashar al-Assad nga rebelët islamikë të udhëhequr nga Hayat Tahrir al-Sham (HTS).
Ministrja e Jashtme gjermane, Annalena Baerbock, mbikëqyri rifillimin e operacioneve gjatë një vizite në kryeqytetin sirian, kanë konfirmuar zyrtarë nga delegacioni i saj. Aktualisht, ambasada do të funksionojë me një ekip të vogël politik në terren, me planet për të zgjeruar praninë në varësi të situatës në vend.
Megjithatë, për shkak të shqetësimeve të sigurisë dhe kapaciteteve të kufizuara, shërbimet konsullore dhe të vizave do të vijojnë të trajtohen nga Bejruti, në Libanin fqinj.
Baerbock është takuar më herët këtë vit me liderin e ri de fakto të Sirisë, Ahmed al-Sharaa. Ndërkohë, vendi mbetet në një situatë të brishtë, pasi përplasjet e fundit mes forcave besnike të Assadit dhe sundimtarëve të rinj kanë shkaktuar mbi 1,000 viktima, kryesisht civilë, sipas organizatave monitoruese të luftës.
