Udhëheqësi suprem iranian Ali Khamenei dërgoi ministrin e tij të jashtëm në Moskë të enjten me një letër për presidentin Vladimir Putin për të informuar Kremlinin rreth negociatave bërthamore me ShBA-në, e cila ka kërcënuar të bombardojë Republikën Islamike.
Presidenti i ShBA-së, Donald Trump, e ka kërcënuar vazhdimisht Iranin me bombardime dhe të zgjasë tarifat për vendet e treta që blejnë naftë iraniane nëse Teherani nuk arrin një marrëveshje me Uashingtonin për programin e tij të diskutueshëm bërthamor. Shtetet e Bashkuara kanë zhvendosur avionë shtesë luftarakë në rajon.
Administrata Trump dhe Irani zhvilluan bisedime në Oman fundjavën e kaluar që të dyja palët i përshkruan si pozitive dhe konstruktive. Përpara një raundi të dytë bisedimesh që do të zhvillohet në Romë këtë fundjavë, Ministri i Jashtëm, Abbas Araqchi, tha të mërkurën se e drejta e Iranit për pasurimin e uraniumit nuk është e negociueshme.
Rusia, një aleat i vjetër i Teheranit, luan një rol në negociatat bërthamore të Iranit me Perëndimin si një anëtare e Këshillit të Sigurimit të OKB-së me veto dhe nënshkruese e një marrëveshjeje të mëparshme bërthamore që Trump braktisi gjatë mandatit të tij të parë në 2018.
“Për sa i përket çështjes bërthamore, ne kemi pasur gjithmonë konsultime të ngushta me miqtë tanë Kinën dhe Rusinë. Tani është një mundësi e mirë për ta bërë këtë me zyrtarët rusë”, tha Araqchi për televizionin shtetëror iranian, shkruan Reuters, transmeton Klankosova.tv.
