“Ato janë çështje të Prishtinës”, tha kryeministri në detyrë, Ablin Kurti të martën më 6 maj, kur u pyet nëse pret përgjigje pozitive nga Lidhja Demokratike e Kosovës, pas ftesës së dërguar dje.
Kurti u pyet nga mediat nëse “opozita po e zvarritë konstituimin nga frika se më pas LVV-ja do të formojë qeverinë e re”.
“Nuk është kollaj të analizojmë frikën e opozitës, edhe kjo është punë për analista. Unë kryeministër, vazhdojmë tutje ose VVazhdojmë tutje”, tha Kurti duke qeshur, raporton KosovaPress.
Deputetët kanë dështuar sërish më 5 maj të konstituojnë Kuvendin e Kosovës, pasi LVV-ja nuk ka arritur t’i sigurojë 61 votat e nevojshme për kryeparlamentar.
Deri më tash janë bërë njëmbëdhjetë përpjekje të pasuksesshme për konstituim.
Lëvizja Vetëvendosje nuk po heq dorë nga emri i Albulena Haxhiut si e propozuar për kryeparlamentare, ndërkaq PDK dhe AAK po kërkojnë që të ndryshohet propozimi.
LDK, në anën tjetër, është shprehur kundër çdo propozimi të LVV-së.
Në dy përpjekjet e fundit për konstituim të Kuvendit, LVV ka kërkuar që kryetari i Kuvendit të votohet në mënyrë të fshehtë, por kjo është kundërshtuar nga partitë e tjera.
